Olentzero joan da gero, berriz ere, mendira lanera. Eta oraingoan ere ezin izan diot galdetu nola moldatzen den opari denak gau bakarrean banatzeko. Seguru asko aspaldi ebatzi zuela hark matematikariek oraindik guztiz askatzeko gai izan ez diren problema: nonbaiten hasita (abiapuntuan), zein da Euskal Herriko etxe guztiak behin bakarrik eta azkenean abiapuntura itzuliz, zeharkatzen duen bide laburrena?
Etxe gutxi baleude, akaso; problema erraza litzatekelako, ordenagailu batekin aise kalkulatu daitekeena. Baina horrenbeste etxerekin… N etxe baleude, N! (N-faktorial, hau da, 1 x 2 x 3 x … x (N-1) x N ) balizko bide leudeke. Bo, bo , bo, esan dezagun N=10000. Zenbat balizko bide? N! = 2.846259681×1035659
Olentzero ez den edonorentzat, zenbakitxo handi samarra! Eskerrak gure Olentzeroren buru handiari, entendimentuz jantziari, aukera horien artean aukeratuz, kalkula dezakeelako zein den biderik laburrena!
Hurrengo urterako, opari gisa, nola egiten duen esplikatzeko eskatuko diot, zalantzarik gabe.
Goian aipatutako problema “Saltzaile ibiltariaren ebazkizuna” bezala ezagutzen da eta konputazio teorikoan garrantzitsua da [1]. Oso sarrera interesgarria da Wikipediakoa (ingelesez) [2].
[1] https://eu.wikipedia.org/wiki/Saltzaile_ibiltariaren_ebazkizun
[2] https://en.wikipedia.org/wiki/Travelling_salesman_problem