Leyre Azpilicueta NUPeko Ramón y Cajal ikertzailea saritu du telekomunikazio ingeniaritzako profesionalen munduko elkarterik handienak
Ibilbide Profesionalaren Erdibideko Lorpen Nabarmenaren Lot Shafai Saria jaso du
Leyre Azpilicueta Fernández de las Heras Nafarroako Unibertsitate Publikoko (NUP) Ramón y Cajal ikertzaileak Ibilbide Profesionalaren Erdibideko Lorpen Nabarmenaren Lot Shafai Saria jaso du IEEE Antenen eta Hedapenaren Elkarte Zientifikoaren eskutik. Elkarte hori telekomunikazio ingeniaritzako profesionalen munduko elkarterik handiena da. Elkarte horrek Florentzian (Italia) egin zuen urteko biltzarrean eman zen saria.
Sariak 41 urtetik beherako emakumeen ibilbidea aitortzen du, baldin eta antenen eta hedapenaren arloan ekarpen zientifiko esanguratsuak egin badituzte eta arlo horretan etorkizuneko emakume belaunaldien eredu bihur badaitezke. Zehazki, Leyre Azpilicuetaren kasuan, komunikazio-sistema berrietarako teknika hibridoen bidez uhin elektromagnetikoen hedapena modelatzen egindako ekarpena aitortzen da.
Leyre Azpilicuetaren CV laburra
Leyre Azpilicueta Telekomunikazio ingeniaria (2009) eta arlo horretako doktorea (2015) da NUPen. Telekomunikazio-ingeniariaren lanetan aritu da Osés RFID enpresan eta irakasle eta ikertzaile lanetan Monterreyko Teknologikoan (Mexiko). 250 argitalpen baino gehiago ditu aldizkari zientifikoetan eta ekarpenak kongresuetan, eta, gainera, 2014, 2015, 2019 eta 2020ko nazioarteko konferentzietan saritutako argitalpenen egileetako bat da. Telekomunikazioei buruzko aldizkari zientifikoen editore elkartua da, hala nola “IEEE Sensors Letters Journal”, “Computer Communications Journal” eta “International Journal of Electronics and Communications”, eta zenbait kargu izan ditu IEEE Antenen eta Hedapenaren Elkarte Zientifikoan 2020tik.
Leyre Azpilicuetak sari ugari jaso ditu azken urteotan, hala nola IEEE APS Doctoral Research Award, Telekomunikazio Ingeniarien Elkargo Ofizialak (COIT) emandako doktoretza-lan hoberenaren saria edo Monterreyko Teknologikoak 2020an eta 2021ean emandako Irakasle Nabarmenaren Saria.
Egun, Leyre Azpilicueta NUPeko Smart Cities Institutuan (ISC) ari da ikertzaile-lanetan Ramón y Cajal kontratu batekin. Zientziaren, Berrikuntzaren eta Unibertsitateen Ministerioak ematen ditu lehia handiko laguntza horiek, eta haien bidez nazioarteko ikertzaileak I+Gko zentroetan lanean hastea sustatzen da. Honako hauek dira bere ikerketa-interesak: irrati-hedapena, 5G eta 6G irrati-sistema mugikorrak, komunikazio-komunikazioak, hari gabeko sentsore-sareak eta kanal elektromagnetikoen modelatzea.
Argazkia: Leyre Azpilicueta, bere sariarekin, NUPen.