Hizkuntzaren gorputza naiz laztantzen ari,

mintzo gabe hitzetan, omen olerkari.

Nire aurrean dago, orrialde zuri,

aspalditik ezarri paper zati hori.

 

Aditza hezurra dut, zentzu eramaile,

‘ta izena giharra, mugida emaile,

lokailua tendoia, guztien lotzaile,

erakuslea zaina, bizitza piztaile.

 

Halere nor zara zu, hitzaren egile,

gramatika sortzaile, esaldi batzaile?

 

Aspalditik bazoaz, hizkuntzaz hizkuntza,

gizarteen odola,

elea.

 

Elea,

ideien zizelkari,

gure hitzen nahasle, hizkuntzaz hizkuntza,

haien harremanetan oi, hainbat zalantza!

 

Zilarrezkoa zara, haien arabera.

Urrezko dut isila, bai erantzutera.

 

Gorputzaren hizkuntzaz, asmatzeko keinuz,

hitzik gabe mintzatuz, ilea lisatuz,

zangoak gurutzatuz, begiak kliskatuz,

ferekatuko zaitut, anitz sentimenduz.

 

2018/02/12

Hatsaren Poesia – Olerki Bilduma – 2019