Munduan ederrena, da zure hizkuntza:

amaren sabelean jadanik ohitza,

haren ahots leuna, kantuaren antza,

ematen has zekizun, zure nagusitza

oin-puntez erakusten bilintzi-balantza.

 

Munduan ederrena, da zure mintzaira:

honen hitz ugaritan hainbeste kondaira

ikasi zenituen txikitik handira,

non edertasunaren betiko distira

honen hiztegietan duzun agerira.

 

Munduan ederrena, da zure mintzoa:

belarri maiteetan maitasun zintzoa

xuxurlatu zenuen, su ‘ta gar bertsoa,

eta alaiak sortu haren barre zantzoa

zurekin pasatzeko bizitza osoa.

 

Munduan ederrena, duzu lengoaia:

haurrei haren hitzetan -zer ikas bidaia!

erakutsi zenien lurraren paisaia,

‘ta beste gizakien ohiko usaia,

bizirik irauteko funtsezko talaia.

 

Munduan ederrena, da zure hizkera:

burura datorkizu, bai, amaren era

duela ama orok, ‘ta duzun aukera

duela anai orok, zure onartzera,

hola orok bakean lasai bizitzera.

 

Votre langue est la plus belle du monde!

Tu lengua es la mas bonita del mundo!

Your tongue is the most beautiful in the world!

A tua lingua é a mais bela do mundo!

Ditt spraak er det vakreste i verden

La tua lingua è la piu bella del mondo

 

 

2020/11/11

 

Hatsaren Poesia – Olerki Bilduma – 2021