O GUBIERNO D’ARAGÓN METE A LA DISPOSIZIÓN D’OS ZENTROS EDUCATIVOS D’A COMUNIDAT UNA ACHENDA DICHITAL ESCOLAR MULTILINGÜE TA O CURSO 2022-2023

O Gubierno d’Aragón, a traviés d’as Direzions Chenerals de Politica Lingüistica y Planificazión y Equidat, y con a colaborazión de l’Instituto Aragonés d’a Chovenalla y d’o Ministerio de Cultura y Esporte d’o Gubierno d’España, ha meso a la disposizión d’os zentros educativos d’a Comunidat una achenda escolar dichital ta o curso 2022-2023.

Se trata d’una ferramienta multilingüe (castellano, aragonés, catalán d’Aragón, anglés y franzés) que va destinada a os zentros educativos de Secundaria, Bachillerato y Formazión Profesional y que ofrexe conteniu didautico ta tratar temas transversals a partir d’efemerides aragonesas y universals.

Cada diya d’o curso se fa memoria d’un evento de relevanzia ta la istoria u a cultura aragonesa u amuestra una mazada relazionada con a calendata en aragonés u en catalán d’Aragón, y cada mes s’acobaltan dos u tres efemerides sobre as cuals treballar en clase, incluyindo propuestas didauticas.

Istos materials s’aloxan en una WEB que sirve de punto de dentrada ta o calandario dichital y permite azeder a os acontezimientos, personaches, mazadas populars (en aragonés y catalán d’Aragón), asinas como eventos y promozions de l’Instituto Aragonés d’a Chovenalla y o carnet choven.

L’Achenda s’integra en os calandarios más usuals ta mobil, como Google Calendar, y ye compatible con atras achendas que pueden visualizar-se conchuntamén, de traza que pueda estar util tamién ta incorporar fayenas de clase u avisos particulars.