Ametsetan dudana amesten duzula,

amets sekretua dut, maite amestua.

Ametsetan duzuna amesten dugula,

amets sekretua dut, bihotz maitatua.

 

Neguko elurretan mendi zurietan,

ziztu bizian zaitut aldapa behera

hatsantua jarraitzen eski zaluetan,

buruan jasotzeko zure hasbehera.

 

Itsaso urdinean, olatu harroan,

ontzi belak dizkizut ixten-irekitzen,

leman zaitudalarik, oi, amets eroan,

lehorrera bizirik gu etorrarazten.

 

Haritz berdeak babes, udaberri hartan,

gure belarrietan erreka kantari,

erriberan gautza betiko soroan,

hitz leunenak eginez, maitasun atari.

 

Ametsetan dudana amesten duzula,

amets sekretua dut, maite amestua.

Ametsetan duzuna amesten dugula,

amets sekretua dut, bihotz maitatua.

 

 

2023/01/12

(2024ko Hatsaren poesia olerki bilduman argitaratua)